आहार-निद्रा-भय-मैथुनं च, सामान्यमेतत् पशुभिर्नराणाम्। धर्मो हि तेषामधिको विशेषो, धर्मेण हीनाः पशुभिः समानाः।। “अर्थात् खानेकुराको व्यवस्था गर्नु र खानु, निदाउने अर्थात् सुत्ने ठाउँको व्यवस्था गर्नु र सुत्नु, डर मान्नु र डरबाट सुरक्षाको व्यवस्था गर्नु तथा स्त्री पुरुषको संसर्ग गरेर बच्चा जन्माउनु, यी सबै त मान्छेले मात्र होइन पशुहरूले पनि गरिरहेका छन्। धर्म पालना मात्र मानिसमा हुने विशेष गुण हो। यदि धर्मको पालना गरिएन भने मानिस पनि सिङ् पुच्छर नभएको पशु समान नै हुनेछ, त्यसैले मानिसले धर्मको पालन गर्नुपर्छ। धर्मको पालना भन्नासाथ हामीले अनेक प्रकारका नित्य नैमित्तिक यज्ञ अनुष्ठान तथा वैदिक संस्कारहरु सम्पन्न गर्नुपर्ने हुन्छ। संस्कार विना मानिस पशु तुल्य नै हुन्छ। अर्को तिर हामीलाई आवश्यक पर्ने हावा, पानी, सूर्य या चन्द्रमाको प्रकाश आदि प्रकृतिले निःशुल्क उपलब्ध गराउँछ र त्यो प्रकृतिको सञ्चालन भगवानको अध्यक्षतामा विभिन्न देवताहरुद्वारा सम्पन्न हुन्छ।भगवानले गीतामा भन्नुभएको छ, ” मयाध्यक्षेण प्रकृति: सूयते सचराचरम् । हेतुनानेन कौन्तेय जगद्विपरिवर्तते ॥ ” त्यसैले हामीले हाम्रा संस्कारहरु गर्नैपर्छ र यी बाहेक पनि देवताहरूको सन्तुष्टिका लागि विभिन्न यज्ञहरु पनि गर्नुपर्ने हुन्छ। “